Kismaayo,(insidesomalia.org)- Wararka naga soo gaaraya Magaalada Kismaayo ayaa sheegaya in ay shalay galinkii dambe soo gaartay Magaaladaasi diyaarad weyn oo sidey Xubno ka mid ah Mucaaradka Dawladda Soomaaliya, gaar ahaan qolyaha Fadhigoodu yahay Magaalada Asmara.

Wafuudaasi waxaa soo dhaweeyey xubno ka tirsan Isbaheysigooda oo jooga Magaalada Kismaayo, waxa ayna xalay oodhan lahaayeen kulamo hoose oo ay uga hadlayaan xaaladaha Magaalada.

Warar hoose oo ka soo baxaya Magaalada Kismaayo ayaa sheegaya in ay Xubnahan xalay la kulmeen Sheekh Xasan C/laahi Cali (Xasan Turki) oo ka mid ah Kooxaha ka soo horjeeda Dawladda Faderaalka  KMG ah ee Soomaaliya.

Warka ayaa sheegaya in ay Xubnahan gudoonsiiyeen Wadaadkaasi iyo Kooxihii horey Magaalada ujoogay kaalmooyin ay kala soo kicitimeen Magaalada Asmara oo ay mudo ka badan 1 sanno joogeen.

Ujeedada ay utageen Magaalada Kismaayo ayaa lugu sheegay mid ku wajahan sidii loo dhisi lahaa Maamul wax ka qabta Adeegyada Bulshada ee Magaalada Kismaayo, markaasna dibu heshiisiin loo dhex dhigilahaa Beelaha ku dhaqan gobalkaasi.

Diyaarada ka soo qaaday Wafdigan Magaalada Asmara, waxa ay markii dambe ku laabatey Magaalada Nayroobi ee xarunta Dalka Kenya, waxaana ay noqotey diyaaradii ugu horeysay ee Kismaayo timaadaa ilaa maalintii Magaalada laga saaray Barre Hiiraale.

Tagida Xubnahan ee Jubada Hoose ayaa ku soo beegmaysa xili lafilayo in ay Shabeelada dhexe tagaan Wafuud uu hogaaminayo Sheekh Shariif Sheekh Axmed, kuwasoo ah Mucaaradka Dawladda Soomaaliya ee dhawaan saxiixay heshiis ku aadan nabad ku soo celinta Soomaaliya.